Dituria

  • Rrit madhësinë e fondit
  • Madhësia normale e fontit
  • Ul madhësinë e fontit
Home
Debattartiklar


Nga Nora Kalaja, New York/Prishtinë: Kastriot Preteni (Kas) lançon videoklipin “Product of Society”

Kastriot Preteni (Kas) lançon videoklipin “Product of Society”

Nga Nora Kalaja, New York/Prishtinë

Karriera e artistit Kastriot Preteni me pseudonimin KAS ka evoluar që nga fillimet e rinisë së tij në Kosovë, kur ai ishte 11 vjeç që u mor me muzikë e deri më sot në Norvegji, ku është evidente pjekuria në lirikat, stilin e muzikës dhe kreativitet. Videografia e artistit përfshin hitet “Imma Get My Piece”, filmuar në Paris dhe “Till Death Do Us Part”, që brenda një kohë të shkurtër arritën 65,000 shikime në youtube.

Në 4 Janar 2013 Kas laçoi videolipin e ri “Product of Society” e cila ka marrë pëlqim nga fansat dhe po bie në sy dhe nga artistë të tjerë të njohur. (Shiko videoklipin: http://www.youtube.com/watch?v=rX9OZ9KHCzA).

Kam marrë shumë përgjigje pozitive nga publiku, fansa dhe artistë për këngën dhe videoklipin e ri. Me 13/14 shkurt jam ftuar në emisionin “Relax Show” në Kosovë, ku do jem prezent dhe do festoj 5 vjetorin e pavarësisë të mëmëdheut tim,” tha KAS.

Realizimi i videoklipit u krye nën drejtimin e Ufollow Movement dhe KAS, ku bien në sy koncepti origjinal i artistit si dhe maskat e veshura në klip. Inçizimet filluan në nëntor 2012 dhe përfunduan një muaj më pas.

Porosita të gjitha pajisjet e duhura dhe nevojitshme për projektin, duke përfshirë dhe 40 maska nga Kina, që i kam sponsorizuar vetë. Bllokuam një rrugë komplet për të realizuar një skenë kryesore që përbënte 50 veta plus aktorë ekstra. Videoklipi u lançua me 4 janar dhe fansat mund t’a blejnë këngën në iTunes, Spotify and YouTube,” shtoi artisti KAS.

Mesazhi pas këngës “Product of Society” (Produkt i Shoqërisë) është që njeriu duhet t’i bëjë vetë zgjedhjet në jetë dhe jo të ndjekë trende pa i kuptuar mirë arsyet. Maska simbolizon personin e influencuar nga shoqëria që humb vetveten nën influencën e shoqërisë duke jetuar një gënjeshtër.

Kënga shpreh faktin që ne të gjithë jemi produkt i shoqërisë, në aspektin pozitiv dhe negativ. Secili nga ne mendon se duhet të veprojmë, mendojmë dhe ndejmë në një mënyrë specifike, për t’iu përshtatur rrethanës. Për këtë arsye secili person në video ka veshur një maskë. Jetojmë në një botë të frikshme, prandaj dhe tema e videos është horror. Shoqëria ka vendosur kërkesa për njeriun, që ndikon në zgjedhjet e tij. Në teori, jemi të lirë të marrim vetë veprimet tona, zakonisht ne marrim vendime të lehta. Prandaj dhe shoqëria ka influencë në zgjedhjet tona. Për këtë arsye ne jemi produkt i shoqërisë. Shoqëria na ka bërë ato që jemi. Mesazhi pas kësaj kënge është që duhet të mendojmë jashtë normës, dhe të mos ecim dhe jetojmë si ‘zombi’, duke pranuar dhe favorizuar çdo trend ose vlerë që na tregon se çfarë konsiderohet ‘normale. Mos ki frikë të jesh vetvetja. Hiqe maskën dhe trego vetveten!,” tregon KAS.

Pas realizimit të këngës “Product of Soceity” KAS bashkëpunoi me artistin e njohur Kobra aka Helmuesi i grupit TBA, në këngën “Goodbye” e cila u lëshua me 27 janar në youtube. KAS pret të nxjerrë një videoklip të ri gjatë verës, me një koncept origjinal të tij.

 

Fehmi Kryeziu: Rëndësia e përdorimit të teknologjisë dhe internetit në mësimdhënien e gjuhës angleze

 

 

Fehmi Kryeziu

Rëndësia e përdorimit të teknologjisë dhe internetit në mësimdhënien  e gjuhës angleze

Shekujt që kemi lënë pas, kanë ‘’prodhuar‘’ mendje të ndritura të cilat kanë bërë zbulime nga më të thjeshtat deri te ato më epokalet. Por ndoshta asnjërit  prej tyre nuk i kishte vajtur në mendje se një ditë njerëzit do të ishin në gjendje të komunikonin me njëri-tjetrin nga njëri skaj në skajin tjetër  të botës. Mund te këtë qenë e pakapshme për ta që të gjitha veprat, nga ato me të voglat e deri te ato më voluminozët mund të lexoheshin “online”, kudo dhe kurdo që njerëzit duan! Përderisa shekujt e kaluar janë emëruar me emërtime të ndryshme për sa i përbëtë progresit, shekulli ynë, pra shekulli 21, me të drejtë quhet shekulli i informacionit dhe teknologjisë. Teknologjia dhe informacioni janë të lidhura me kompjuterin dhe internetin. Pra, mund të themi se jetojmë në një kohë ku teknologjia ka shtrirë “sundimin” e saj dhe se duket qartë që ky sundim do të jetë edhe më provokues në të ardhmen. Shtrirja dhe përmasat që ka marrë përdorimi i internetit janë të jashtëzakonshme. Nga disa mijëra përdorues në vitet e para të tij, deri në miliarda përdorues në ditët e sotme. Atëherë, interneti qenka një bibliotekë gjigante, qenka një botë e tërë mesazhesh dhe informatash, rrjetesh telefonike dhe një shtëpi e madhe botuese në gjithë globin!

Interneti si mundësi qëndron hapur njëzetekatër orë në çdo ditë të jetës sonë, ku ne mund të gjejmë të gjitha llojet e informacionit, thënë ndryshe; “është një autostradë ku në vend të veturave lëvizin ide e mendime me shpejtësinë dritës”.

Sot, nxënësit jetojnë në një botë të rrethuar me teknologji. Pra , teknologjia është nevojë e ditës. Evolucioni i shkollës kërkon një staf të përgatitur mirë, por dhe nxënësit duhet të jenë domosdo në trendët e reja që sjell koha. Ikja nga hapat tradicional të shkollës, ku shkollat dhe klasat më shumë ngjasonin me fabrikat dhe ku mësuesi sillej si një shef duke urdhëruar, tani në shekullin 21 duhet mbështetur një shkollë tjetër, bashkëkohore, ku nxënësi duhet të jetë kreativ, hulumtues e vlerësues, kjo është domosdoshmëri për një mësim dhe shkollë cilësore. Pikërisht, përdorimi i kompjuterit dhe teknologjisë informative nëpër klasa nxitë të nxënësi imagjinatën dhe e bën atë kreativ e hulumtues për të mësuar në vazhdimësi. Është e nevojshme që nxënësve tu mësohen aftësitë e shekullit 21, në të cilin ne jetojmë, e kjo mund të bëhet vetëm nëse mësuesit e tyre janë në funksion të përmbushjes se misionit të tyre në mënyrën më të mirë të mundshme. Andaj, shkrimtari i njohur amerikan dhe njohës i çështjeve të arsimit dhe mësimdhënies, Michael Prensky, thotë: ’’Nxënësit e sotëm mendojnë dhe përpunojnë informata që dallojnë krejtësisht nga ato të paraardhëseve të tyre, duke marrë parasysh se: të gjithë nxënësit tanë sot e kanë gjuhë amtare gjuhën digjitale të kompjuterëve, video lojërat dhe internetin dhe duke avokuar se mësimdhënësit e sotëm duhet të mësojnë të komunikojnë në gjuhën dhe stilin e nxënësve të tyre“...

Hulumtimet e bëra në shkollat  amerikane kanë treguar qartë se  dijet e  nxënësve të shkollave që kanë përdorur kompjuterin dhe internetin në lëndët mësimore kanë qenë të një niveli shumë më të lartë se niveli tek shkollat që nuk kishin përdorur teknologjinë në procesin mësimor. Ligjërimet e thata të mësuesve duhet zëvendësuar me pamjet vizuale dhe qasje tjetër fare në klasat e shekullit 21.

Përdorimi i teknologjisë në mësimdhënien dhe mësimnxënien e gjuhës angleze në shkollat tona ka marrë një shtrirje të konsiderueshme. Pajisja e disa shkollave me kompjuter dhe internet ka  bërë  të mundur që orët e gjuhës angleze të bëhen pjesë e një komunikimi global  brenda klasës. Nxënësit, me ndihmën e arsimtarit të tyre mund të komunikojnë me nxënës të shkollave të vendeve të ndryshme në gjithë botën, gjë e cila ndihmon edhe në shkëmbimet  reciproke dhe marrjen e informacioneve të reja. Përveç kësaj, interneti ofron një oqean të tërë të burimeve gjuhësore, të aktiviteteve  të ndryshme të karakterit gjuhësor, kuizeve  të cilat mund të  vihen në funksion të nxënësve  për një arritshmëri sa më të lartë në nxënie.

Fuqia e internetit dhe informacionet në të, janë burime që duhen konsumuar. Sot interneti disponon rrjete të fuqishme sociale si: facebook, twitter, Linkedin, my space etj., të cilat edhepse të themeluara për qëllime të ndryshme paraqesin një mundësi të mirë të shkëmbimit të informacioneve dhe përvojave midis njerëzve të profileve të ndryshme. Vend elitar në këto rrjete zënë padyshim të mësuarit e gjuhës angleze. Shkollat dhe kolegjet me prestigjioze të botës, duke parë se numri i anëtarëve të këtyre rrjeteve po i afrohet miliardit kanë ngarendur të plasojnë  punën e tyre për qëllime edhe komerciale, megjithatë individi është përfitues në përthithjen e informatave të ndryshme në rrjetin e internetit. Me një përdorim të organizuar dhe të mirëstrukturuar këto rrjete ofrojnë dhe lehtësojnë dukshëm komunikimin në mes të mësimdhënësve dhe nxënësve të tyre. Një përqindje vogël e arsimtarëve të anglishtes në Kosove dinë që në kuadër të projektit Basic Education Program – BEP, është zhvilluar ueb-faqja e projektit, e cila përmban edhe platformën CONNECT. Në kuadër të kësaj platforme janë krijuar disa grupe, njëra nga këto është edhe KOSOVO ENGLISH LANGUAGE TAECHERS - KELT. Të gjithë mësimdhënësit që lidhen në këtë platformë përfitojnë të gjitha shërbimet e ofruara nga ky program, pra mund të marrin material të kursit për përdorimin e teknologjisë informative në mësimdhënie dhe të nxënit e gjuhës angleze.

Shekulli 21, karakterizohet si shekull i informatikës, megjithatë, pa zotëruar aftësitë esenciale, siç janë: leximi, përdorimi i dokumenteve, shkrimi, numërimi, komunikimi, puna ekipore, aftësia e të menduarit, përdorimi i kompjuterit dhe të mësuarit në vazhdimësi, është e zorshme të thuash se mund të zotërohet profesionalisht dhe me shkathtësi të duhur përdorimi i kompjuterit.


Shkroi Fehmi Kryeziu  profesor i gjuhes dhe letersis angleze

Shkolla fillore ‘’Beqir Gashi ‘’ ne Mleqan - Malisheve

Konsulent i USAID ne programin PATH

Fasilitator i certifikuar ne komponenetene gjuhes angleze ne:

Perdorimi i teknologjis ne mesimdhenien dhe mesimnxeniene gjuhes angleze.

 

 

Kadri Tarelli: MËSUESI PENSIONIST SAMI DOMNI, QË S’I NDAHET MUZEUT TË SHKOLLËS

Sami Domni

”Mësues i merituar”

Durrës më: 21. 01. 2013

MËSUESI PENSIONIST SAMI DOMNI, QË S’I NDAHET MUZEUT TË SHKOLLËS

Kur më thanë se, në Elbasan në shkollën ”N. Frashëri”, ekziston një muze shkolle, më erdhi mirë. Pse ta fsheh, u habita! Por me keqardhje mendova: ”Çudi! Akoma paska mbetur mësues idealist e drejtues shkolle vizionar që e kanë mbajtur muzeun?” I urova ata  njëmijëherë.  ”fatmirësisht”, që paskan shpëtuar disa sa për nishan!

Mund të diskutohet mes kolegësh mësues dhe specialistësh, por për mendimin tim, asnjë lloj arrësye nuk e justifikon mbylljen dhe shkatërimin e tyre. Mjaftonte një riparim ku të hiqeshin strukturat ideologjike dhe parrullat e kohës. Është një temë mjaft e gjërë, që meriton shkrime të veçanta, por  mungesa e muzeumeve të shkollave, në një farë mënyre na le pa histori, pa të shkuarën, pa këto ”qendra kujtese”, ku nxënësit dhe të rinjtë mund e duhet të njohin kohën. Ku tjetër veçse në muze mund të pasqyrohen përpjekjet e sakrificat e brezave për lindjen, mbrojtjen dhe zhvillimin e arsimit e të shkollës dhe mbijetesa në vorbullat e historisë së trazuar të kombit? A i zëvendëson dot fjala e mësuesit, sado e bukur qoftë ajo, dokumentat e ekspozuar nëpër stenda? Pretendojmë për edukim atdhetar, po ku dhe si!!!??

E njoh lodhjen për ndërtimin e muzeut, e di sa kohë, mund e djerës harxhohet. Është një punë që nis e kurrë nuk bitis. Bashkë me kolegun Bajram Gashi, ish drejtor i shkollës së Shënavlashit, Durrës, në këto dit të Janarit 2013, mundëm të vizitojmë muzeun e shkollës ”N. Frashëri”, këtë ”Vepër” të mbetur, që i ka shpëtuar marrëzisë së prishjeve. Ciceroni, ish nxënës i kësaj shkolle z. Sami Domni, ideatori dhe hartuesi i muzeut, fliste plot krenari. Kishte të drejtë. Është e para shkollë zyrtare shqipe e çelur më 2 gusht 1908 në qytetin e Elbasanit.

Ky muze shkolle, ”unik” në vendin tonë, i vlerësuar në nivel kombëtar, ka arkivin të ndërtuar me kritere shkencore muzeore, me fondin dokumentar të kartotekës, fototekës e filmotekës, fonotekës, videotekës, pinakotekës dhe objekte e relike. Të  gjitha të regjistruara me indeks tematik e alfabetik. Në muze është krijuar edhe fondi i bibliotekës mësimore, unik për llojin e vet, ku ruhen tekstet mësimore nga klasa e I-rë deri në klasën IX-të, të arsimit 9-vjeçar në vite. Pas këtyre fjalëve, është e tepërt të komentohet përmbajtja e stendave, dosjeve dhe objekteve që ndodhen në muze, punuar e ruajtur aq mrekullisht, por e domosdoshme është të shkruhet për z. Sami Domni, mësuesin idealist e pasionant.

Samiu njihet e nderohet nga qytetarët si veprimtar i arsimit për 42 vjet punë. Kurdoherë i shquar si mësues i talentuar, metodist, i përkushtuar në punën për ruajtjen dhe pasurimin e vlerave të traditës arsimore të Elbasanit dhe të shkollës ”Naim Frashëri” në veçanti. Njëkohësisht njihet dhe vlerësohet si arkivist, bibliograf, studiues i palodhur dhe piktor, pasi është autori për realizimin grafik e dokumentar të këtij muzeu. Gati në të gjitha shkollat e Elbasanit, por edhe më gjërë, është kërkuar përvoja dhe ndjerë ndihmesa që ka dhënë për ngritjen e muzeve të shkollave të tjera, jo vetëm në qytet, por edhe në Gjilan-Kosovë.

Jetëshkrimi i Samiut është vërtet i bukur. Një pasuri e vërtetë shpirtërore dhe njerëzore. Cilido ka të drejtë të krenohet. E gjithë jeta e tij është e mbushur plot veprimtari të dobishme, ku spikat shpirti i tij arsimdashës e atdhetar. Pasioni për punën dhe dashuria për shkollën, janë të tjera vlera që e bëjnë atë model i qytetarit të përkushtuar, i cili nuk kursehet për t’i shërbyer arsimimit dhe edukimit të brezave të rinj me norma qytetarie, ndjenja njerzore dhe atdhedashurie.

Mund të përmendim:

-Për shumë vite ka qënë anëtar i Kolegjumit të revistës së  johur ”Pionieri”. Ndërsa kohët e fundit ka shërbyer si redaktor i gazetës arsimore ”Përvojë”; gazetë rajonale, arsimore, metodike, kulturore.

-Është autor i programit mësimor të lëndës së vizatimit, klasa V – VIII, i ngarkuar nga ana e Ministrisë së Arsimit në vitin1993,

-Gjatë viteve 1994-2004, është kryetar i Shoqatës kombëtare ”Miq të fëmijëve të talentuar”, dega Elbasan.

-Pesë vjet më parë, më 2008, ka krijuar ”Galeri Arti” në shkollën e tij ”N. Frashëri”. E para e këtij lloji në vendin tonë, me rreth 400 krijime në vizatim e pikturë të nxënësve të shkollës” në vite (1973-2012).

-Sot, bën pjesë në bordin e Galerisë ndërkombëtare të piktorëve të vegjël ”Jardin Galerie” në Neë York, ku nxënësit e tij marrin pjesë rregullisht në ekspozitat.

Nuk mjaftojnë vetëm këto. Portreti i Samiut plotësohet duke i shtuar listës së veprimtarive edhe botimet e shumta:

-1982, Broshura metodike “Atyre, që për Lirinë dhanë rininë”.

-1984, Metodika e Vizatimit, për klasën V – VIII.

-1986, Albumi historik ”40-vjetori i kampit të pionierëve ”Q. Stafa”  Durrës

1988. Albumi historik ”80-vjetori i shkollës ”Naim Frashëri” në Elbasan”.

2003. Libri -”Pasaporta” e shkollës”- (libër dokumentar, përshkrues e metodik për historikun e shkollës “Naim Frashëri” në Elbasan.

2009. Libri - Album tregues ”Mirënjohje. Për mësuesit e nderuar të qytetit tim”. botim me rastin e 100-vjetorit të shkollës ”Normale”.

Ka botuar 186 shkrime me karakter informativ, metodik, studimor dhe përgjithësues në organet e shtypit: ”Mësuesi”, ”Revista Pedagogjike”, ”Historia e Arsimit”, ”Pionieri”, ”Horizonti”, ”Fatosi”, ”Bashkimi”, ”Shqiptarja e Re”, ”Shkumbini”, ”Fjala e Lirë”, ”Intelektuali”, ”Elbasani”.

Edhe tani që është në pension, nuk e mban vendi. Çdo ditë do ta gjesh në muze, ku vullnetarisht vazhdon punën për mirëmbajtjen, ruajtjen, pasurimin, sistemimin e arkivit. Më kënaqësi pret e përcjell vizitorë të shumtë, por kënaqet sidomos kur në muze vijnë grupe nxënësish dhe të rinjsh.

Sami Domni mban titullin ”Mësues i merituar”, njëkohësisht  edhe titullin ”Mirënjohja e qytetit” të Elbasanit. Ai meriton më shumë.

Si kolegë të vjetër i urojmë z. Sami shëndet e jetë të gjatë në dobi të shkollës, arsimit dhe qytetarisë së Elbasanit.

Kadri Tarelli

Durrës

 

Begzad BALIU: SHEKULLI I PAVARËSISË DHE I LETËRSISË SHQIPE

Begzad BALIU

SHEKULLI I PAVARËSISË DHE I LETËRSISË SHQIPE

Të nderuara Zonja dhe Zotërinj

Ngjarjet e mëdha sjellin edhe vlerësime, të cilat nuk bëhen në të gjitha epokat dhe në të gjitha situatat. Prandaj 100 vjetori i Pavarësisë së Shqipërisë në jetën tonë ka sjellë kaq shumë vlerësime e rivlerësime, dokumente e kujtime, botime e krijime, të cilat nuk i kemi pasur për shumë dekada me radhë dhe të cilat sigurisht nuk do t’i kishim edhe shumë kohë, sikur të mos e shënonim një datë kaq të madhe dhe kaq të rëndësishme. Shekulli i Pavarësisë shqiptare na ka bërë më të gjallë, më të përkushtuar, më energjikë dhe madje më të vëmendshëm, për fatet e popullit historik shqiptar, për fatin e popullit modern shqiptar, për fatet e kulturës e të gjuhës sonë.

Etërit tanë, historianë dhe studiues të letërsisë së shekullit XX, historinë e letërsisë dhe madje antologjitë e letërsisë shqipe, në të shumtën e rasteve i ndanin jo sipas periudhave letrare po sipas periudhave historike, sado sikur është vënë jo njëherë në dukje, këtyre periudhave, përkatësisht ndryshimeve historike, ndryshimeve historike dhe shoqërore e kulturore të popullit shqiptar, ju kanë prirë krijuesit, idealistët, përkatësisht njerëzit e letrave.

Deri në fund të shekullit XX, sintetistët e Historisë së letërsisë shqipe nuk kanë pushuar së ndari atë në letërsi të Rilindjes dhe letërsi të Independencës, duke e marrë për kufi të tyre vitin 1912, sado njëra i takonte letërsisë së romantizmit dhe tjetra letërsisë së romantizmit që kishte shtrirë krijimtarinë e saj edhe pas Shpalljes së Pavarësisë, Realizimit, Simbolizmit, Letërsisë sociale dhe madje letërsisë të një krahu të veçantë: letërsisë arbëreshe. Dhe, përtej tyre historinë e letërsisë shqipe e përkufizonin në letërsi të realizmit socialist apo në letërsi të diktaturës, në letërsi të Kosovës dhe në letërsi moderne, në letërsi të realizmit integral dhe në letërsi postmoderne, në letërsi të Qarkut të Prishtinës dhe në letërsi postkomuniste, e kështu me radhë.

Në të vërtetë ndarjet e tilla më shumë se e kanë bashkuar, kur e kur e kanë ndarë letërsinë shqipe në kufij historikë dhe madje në kufij politikë, e kanë mbajtur peng të shkollave letrare dhe koncepteve politike, e kanë përjashtuar për shkaqe politike dhe e kanë linçuar atë për shkaqe ideologjike. E megjithatë, kjo në asnjë mënyrë nuk ka bërë që letërsia shqipe të ketë periudhat historiko-letrare dhe ngjarjet e munguara të një letërsie kombëtare, veprat dhe krijuesit e shquar me ndikim në jetën kulturore shqiptare dhe veprat e krijuesve, që rrezatuan artin e tyre edhe në përmasa ndërkombëtare. Le të jetë prandaj kjo arsyeja pse edhe në këtë shekull të pavarësisë, nuk do të duhej të na mungonin vlerësimet për gjendjen, prirjet dhe rrjedhojat e saj, në jetën tonë shkencore dhe kulturore.

Gjatë këtij shekullit pavarësie e robërie njëkohësisht të letërsisë shqipe shkrimtarët shqiptarë i kanë jetuar disa shtete paralele: shtetin shqiptar të mbetur në kufijtë etnikë të gjysmës së saj, shtetin grek, shtetin italian dhe shtetin jugosllav e shtete të tjera europiane. Brenda këtyre shteteve të shekullit të fundit, shkrimtarët shqiptarë përkatësisht letërsia shqipe është zhvilluar duke përkrahur a kundërshtuar koncepte të ndryshme politike, ideologjike dhe nacionale. Ajo është zhvilluar, kur si pjesë e strukturave institucionale, që ka përkrahur shteti shqiptar, e kur madje edhe përmes një ilegaliteti të plotë gjuhësor të shteteve fqinje në ish-Jugosllavi, e më në fund edhe si përpjekje e fundit për të mbijetuar kodin etnik të saj në Itali dhe Greqi.

Ndonëse pjesa më e madhe e letërsisë shqipe është zhvilluar kryesisht në dy shtetet fqinje, në Shqipëri dhe në ish-Jugosllavi, shkrimtarët shqiptarë kanë mbijetuar sisteme politike përgjithësisht të afërta: monarkinë, pushtimin nazi-fashist, komunizmin dhe demokracinë, por edhe dy mentalitete krejtësisht të kundërta. Në të parin, pra shtetin shqiptar, monarkinë, përkatësisht mbretërinë feudale, ndërsa në të dytin, monarkinë fashiste; në të parin pushtimin fashist, ndërsa në të dytin pushtimin ‘çlirimtar’; në të parin, ideologjinë komuniste, ndërsa në të dytin nacionalizmin komunist; në të parin tranzicionin e përshtrirë demokratik e në të dytin, luftën për mbijetesë biologjike.

Brenda këtyre shteteve, brenda këtyre periudhave dhe sistemeve politike, si dhe brenda demokracisë europiane, letërsinë shqipe e kanë shkruar dhe janë bërë pjesë e letërsisë gjithëkombëtare poetët: Gjergj Fishta, Fan Noli, Migjeni, Ndre Mjeda, Luigj Gurakuqi, Lasgush Poradeci, Esad Mekuli, Martin Camaj, Dritëro Agolli, Dushko Vetmo, Azem Shkreli, Fatos Arapi, Vorea Ujko, Ali Podrimja, Xhevahir Spahiu, Visar Zhiti, Zef Zorba, e të tjerë, prej pendës së të cilëve janë botuar veprat më të mira të shekullit XX: Lahuta e Malcis, Kur qanë e qesh bilbili, Vargjet e lira, Juvenilia, Psallme murgu, Hanko Halla, Mall e brengë, Vallja e yjeve, Ylli i zemrës, Për ty, Pelegrin i vonuar, Dranja, Nga bibla e heshtjes, Bukuria e zezë, Etje, Lum Lumi, Buzë të ngrira në gas etj. E megjithatë ka pasur edhe poetë të tjerë dhe vepra letrare të tjera që më parë se sa jetën estetike e kanë bërë jetën reale: poema Përse mendohen këto male e Ismail Kadaresë, poema Nënë Shqipëri e Dritëro Agollit etj.

Brenda këtyre shteteve, brenda këtyre periudhave dhe sistemeve politike, letërsinë shqipe e kanë shkruar dhe janë bërë pjesë e letërsisë gjithëkombëtare prozatorët: Mihal Grameno, Millosh Gjergj Nikolla-Migjeni, Mitrush Kuteli, Petro Marko, Dhimitër S. Shuteriqi, Jakov Xoxa, Adem Demaçi, Ismail Kadare, Dritëro Agolli, Rexhep Qosja, Sterio Spasse, Nazmi Rrahmani, Sabri Godo, Bilal Xhaferi, Martin Camaj, Anton Pashku, Kasem Trebeshina, Pjetër Arbnori, Jusuf Buxhovi, Ridvan Dibra etj.; prej penës së të cilëve janë botuar novelat dhe romanet më të mira të shekullit XX: Dr. Gjëlpëra zbulon rrënjët e dramës së Mamurasit, Novelat e qytetit të veriut, Ago Jakupi dhe tregimet e tjera, Tregtar flamujsh, Gjenerali i ushtrisë së vdekur, Lumi i vdekur, Hasta la vista, Kronikë në gurë, Shkëlqimi dhe rënia e shokut Zylo, Kështjella, Ra Berati, Vdekja më vjen prej syve të tillë, Zgjimi, Me valët e jetës, Ali Pashë Tepelena, Kulla, Udhëtimi arbdhetar, Shënimet e Gjon Nikollë Kazazit, Stina e stinëve, Bijtë e askujt etj. E megjithatë ka tregimtarë, novelistë dhe romansierë që me veprat, më parë se sa me vlerat artistike të tyre kanë bërë një jetë të tërë në letrat shqipe të shekullit XX, pikërisht përmes temave shoqërore dhe politike, me të cilat i janë imponuar publikut shqiptar: Fatmir Gjata, Këneta, Sterio Spasse, Afërdita përsëri në fshat dheAta nuk ishin vetëm, Azem Shkreli Karvani i bardhë, Sinan Hasani, Era dhe lisi etj.

Brenda këtyre shteteve, dramaturgët përgjithësisht kanë munguar dhe për një kohë të gjatë më parë se sa për arritje të dramaturgjisë shqiptare, ndoshta me mirë do të ishte të flitej për përkthimin e dramave me përmasa botërore nga Fan Noli, Kristo Floqi e Skënder Luarasi dhe vetëm më pas për dramat e Kolë Jakovës, Sylejman Pitarkës, Rexhep Qosjes, Ymer Shkrelit, Emin Kabashit etj., prej penës së të cilëve janë përkthyer dramat e Shekspirit, të Gëtes apo janë shkruar dramat Toka jonë, Familja e peshkatarit, Mitet e zhveshura, Anija e vjetër, Trilogjia ilire etj.

Brenda kësaj periudhe më në fund janë formuar edhe historianët dhe kritikët e letërsisë: Faik Konica, Fan Noli, Mitrush Kuteli, Dhimitër S. Shuteriqi, Hasan Mekuli, Rexhep Qosja, Mateo Mandala, Agim Vinca, Jorgo Bulo, Sabri Hamiti, Bajram Krasniqi, Rexhep Murtez Shala etj., prej pendës së të cilëve janë botuar vepra të mendimit shkencor: Historia e letërsisë shqipe, Romantizmi, I-III, Porosia e madhe, Lirika e Naim Frashërit, Vepra e Zef Skiroit, Poetika e romanit historik shqiptar etj. E megjithatë, ka pasur në letrat shqipe studiues, e sidomos kritikë letrarë që kanë vendosur jo vetëm për fatet e letërsisë së kësaj periudhe po shumë herë edhe për fatin e krijuesit të kësaj epoke, si: Dalan Shapllo, Kudret Velça, Adriatik Kallulli, Razi Brahimi, Alfred Uçi etj.

Me letërsinë shqipe të Pavarësisë 100 vjeçare, më në fund identifikohen edhe disa revista letrare dhe shkencore, pa të cilat nuk mund të shkruhet historia e letërsisë shqipe. Fjala është për revistat letrare dhe shkencore: Albania, Hylli i Dritës, Korça, Leka, Bota e re, Kritika, Nëntori, Drita, Jeta e re, Fjala, Jehona dhe Shejzat. Historia e letërsisë shqipe edhe mund të shkruhet duke mënjanuar për një arsye a një tjetër shumë nga shkrimtarët shqiptarë, po ajo nuk mund të shkruhet duke e mënjanuar kontributin e cilësdo prej këtyre revistave të cilat gjatë shekullit XX, për shumë dekada kanë bartur vlerat më të arrira të letërsisë së një periudhe a një kohe të caktuar.

I identifikuam gjithë këto vepra, autorë a revista letrare, për të shënuar majat letrare dhe estetike që janë arritur gjatë këtij shekulli, por me këtë rast në asnjë mënyrë nuk e kemi identifikuar krijimtarinë letrare, që për shkaqe artistike apo edhe ekstraletrare ka ndikuar në jetën kulturore, shpirtërore dhe etike të popullit shqiptar, e ato janë vepra që gjatë janë shquar në kritikën letrare dhe historiko-letrare, në shtypin kulturor dhe në shtypin politik-propagandistik, në studimet shkencore dhe në tekstet shkollore etj.

Për shkak se disa prej formave stilistike të veprave letrare kanë vazhduar të paraqiten edhe pas periudhës së romantizmit, ndikimi i tyre është ndjerë pothuajse gjatë gjithë periudhës së parë të shekullit XX, ndërsa për shkak të komunikimit të vonuar a botimit të pjesshëm të letërsisë së arbëreshëve të Italisë, letërsia e romantizmit të shekullit XIX dhe letërsia romantike e botuar me vonesë të konsiderueshme, e ka ushtruar ndikimin e saj pothuajse gjatë gjithë shekullit XX.

Në këtë rrjedhë duam që të kujtojmë gjithashtu faktin se brenda këtyre shteteve, brenda këtyre periudhave dhe sistemeve politike të këtij 100-vjetori të Pavarësisë, letërsinë shqipe nuk kanë arritur ta shkruajnë mjaftueshëm, dhe me jetën e veprën e tyre të bëhen pushtues të vlerave kombëtare dhe universale, edhe një numër shkrimtarësh, për arsye se sistemet e kohës në Shqipërinë e shekullit XX dhe në ish-Jugosllavinë e kësaj kohe, i burgosën, i vranë dhe madje i varën apo eliminuan në mënyra të ndryshme. Fjalën e kemi për ata krijues, si:Musine Kokalari, At Anton Harapi, Vinçenst Prenushi, Fazli Grajçevci, Vilson Blloshmi, Genc Leka, Kasëm Trebeshina, Havzi Nela, At Zef Pllumi, Ethem Haxhiademi, Bilal Xhaferi, Jusuf Gërvalla, të cilët si me jetën ashtu edhe me veprën e tyre u përpoqën të pushtojnë hapësirat e mbetura etnike, kufijtë etnikë të lirisë kombëtare dhe më në fund horizontin e ideologjive të tjera, për më tej, të demokracisë universale.

Duke bërë një përzgjedhje të rrudhur të shkrimtarëve dhe veprave më të shquara të shekullit XX, këtu nuk pretendojmë që të vendosim kufirin historik dhe estetik të perceptimit të gjinive, llojeve, autorëve dhe veprave më të mira të krijimtarisë së letërsisë shqipe dhe studimit të saj. Në këtë hapësirë kohe që më jepet mund të theksoj vetëm disa nga shenjat përgjithësuese të veprave dhe autorëve të saj. Përkundrazi me këtë sprovë ne duam të theksojmë vetëm faktin se ndarjet gjeografike, politike dhe historike në jetën tonë nuk na kanë bërë të paqenë.

Padrejtësitë historike, politike dhe ideologjike në letërsinë shqipe kanë bërë që krijuesit shqiptarë, përveç veprave të mbamendjes kombëtare dhe universit letrar, të shkruajnë edhe vepra letrare, me të cilat himnizonin epoka të caktuara historike dhe kultin e bartësve të tyre, pra tekste për epokën e antikitetit dhe kultin e Mbretëreshës Teutë, për periudhën e arbërit dhe kultin e Skënderbeut, për epokën e Rilindjes dhe luftëtarët e Lidhjes Shqiptare të Prizrenit, për periudhën e Shpalljes së Pavarësisë dhe idhujt e saj Ismail Qemalin e Isa Boletinin, për Mbretërinë shqiptare dhe kultin e Mbretit Zog, për fashizmin dhe Duçen, për komunizmin dhe bardët e tij në Shqipëri e ish-Jugosllavi: Marksin, Engelsin, Leninin, Stalinin, Titon e Enver Hoxhën; për demokracinë dhe zgjimin e ndërdijes sonë europiane, e kështu me radhë.

Në të vërtetë, më shumë se për periudhat ideologjike dhe bartësit e tyre, krijuesit letrarë kanë shkruar poezi për Shqipërinë dhe për Kosovën. Për të parën, sigurisht në të gjitha periudhat e për të dytën, kryesisht në gjysmën e dytë të shekullit XX. Për të parën (Shqipërinë) më shumë për shkak të dashurisë, e për të dytën (Kosovën), më shumë për shkak të dhembjes. Duke shkruar për Shqipërinë dhe për Kosovën, shkrimtarët shqiptarë, kanë shkruar për pasuritë e mëdha materiale dhe shpirtërore që e shquajnë të kaluarën dhe të sotmen shqiptare të tyre, por duke shkruar për Shqipërinë dhe për Kosovën, jo njëherë kanë klithur për dhembjet që jua ka shkaktuar atdheu i tyre, prandaj nuk është vështirë të gjenden edhe vargje proteste për atdheun që të vret, për shkak të dashurisë.

Letërsia e shekullit XX, e cila, sikur u tha deri këtu, është e pasur me periudha, shkolla letrare, krijues, vepra, ngjarje, vende, heronj, personazhe, karaktere, ide, koncepte dhe vlera të tjera historiko-letrare dhe estetike, ka edhe një përbërës të pazëvendësueshëm, kultin e gjuhës. Letërsia e kulteve, do të thoshin studiuesit e saj, është letërsi e përkohshme e mbijetesës jashtëletrare të atyre kulteve, por prej përvojës historik-letrare të letërsisë shqipe dhe letërsisë botërore nuk është vështirë të kuptohet se është pikërisht shenjtëria e gjuhës në letrat shqipe, ajo që e ka shquar pasurinë tonë mendore, kombëtare, kulturore, materiale dhe shpirtërore edhe në krijimtarinë letrare. Le të jetë kjo arsye e mjaftueshme që në këtë çast krenarie njëshekullore për pavarësinë e shtetit shqiptar, të ndjehemi gjithashtu krenarë për pasurinë e gjuhës shqipe, ruajtur brenda letërsisë popullore apo shkruar shekuj me radhë. Le të jetë kjo arsye e mjaftueshme që në këtë çast krenarie të ftojmë shkrimtarët që ta shquajnë shenjtërinë e saj, e kjo do të thotë, t’i zgjerojnë përbërësit semantikë të saj, pa frikën se kulti i saj do t’i vejë në dyshim ngjyresat estetizante të saj. Dëshmitare të kësaj thirrje kam pikërisht traditën historike të letërsisë shqipe. Cila do të ishte poezia e Ndre Mjedës, Martin Camajt apo Azem Shkrelit pa pasurinë leksikore që ofron poezia e tyre, si do të dukej struktura letrare – estetike e prozës së Ismail Kadaresë, Jakov Xoxës apo Mitrush Kutelit, pa sistemin sintaksor që ofron shqipja e tyre; çfarë do të ishte mendimi intelektual i Fan Nolit, Faik Konicës dhe Rexhep Qosjes pa përbërësin intelektualizues të shqipes së tyre! A do të mundë të perceptohej epopeja kombëtare, Lahuta Malcis, ashtu sikur është perceptuar gjatë gjithë shekullit XX, kryesisht për shkak të temave të mëdha të saj, pa pasurinë leksikore dhe sintaksore të trashëgimisë së eposit tonë legjendar.

Po e shquajmë gjuhën shqipe, këtë vlerë të shenjtë të nacionit tonë (Çabej) dhe po e shquaj vendin e saj në letërsinë shqipe të shekullit XX, kur kulti i saj dhe për të, konsiderohet i mbyllur në fund të shekullit XIX, për një arsye tjetër madhore: janë shkrimtarët përkatësisht letërsia shqipe, ajo që e ka ngritur panteonin modern të saj, janë disa nga veprat më të mira të letërsisë shqipe ato që na kanë bërë ta shquajmë mundësinë e gjuhës shqipe për të ndërtuar mendime të mëdha në jetën tonë, janë disa nga veprat e shquara të letërsisë shqipe ato që na kanë bërë krenarë me mundësitë që ofron gjuha shqipe për të lëruar pasurinë kuptimore dhe estetike të strukturave letrare.

Le ta bëjmë prandaj, gjuhën shqipe, trashëgiminë historike të saj dhe strukturën moderne të saj, identifikuese të vlerave të reja, bazë të kërkimeve të reja letrare, përbërëse jo vetëm gjuhësore po edhe estetike të letërsisë së shekullit XXI, shenjë dalluese të letërsisë së shekullit të ri: të Pavarësisë.

· Fjalë hyrëse e manifestimit letrar “100 poetë për 100 vjet të Pavarësisë”, Vlorë, 27 nëntor 2012.

 

Nora Kalaja, Prishtinë – New York: Suksesi i artistit Gashi (Labinot Gashi) nga Drenica në New York

 

 

Suksesi i artistit Gashi (Labinot Gashi) nga Drenica në New York

 



Nga: Nora Kalaja, Prishtinë – New York

Labinot Gashi është një artisti i talentuar me aftësi të shumta si këngëtar, reper, shkrimtar lirikash, model, dhe themelues i grupit “Moxy”. Ka lindur në Afrikë nga dy prindër shqiptar nga Drenica e Kosovës, me 4 tetor, që shpjegon dhe pseudonimin artistik të tij “G4shi”. Familja e tij u shpërngul në Brooklyn, New York në vitin 1997.

E konsideroj veten si një artist shqiptar që përfaqësoj Amerikën – New Yorkun. Si shqiptar familja më ka rritur me moral, tradita dhe respekt për të tjerët. Të gjitha vështirësitë që kemi kaluar si familje më kanë bërë ta vlerësoj më shumë jetën. Nuk bëj muzikë për famë ose pare, por sepse e dua. Besoj se mund të arrij një publik të gjerë nëpërmjet muzikës time. Të jesh në qendër të vëmendjes me jep mundësinë të sjell ndryshim për çështjen e Kosovës. 2013 është një kohë e re, ka ardhur koha për gjeneratën tonë të ngrihet dhe kontributojë për vendin tonë” tha i talentuari Labinot (Larry) Gashi.

Gashi është një artist i pavarur, i cili ka arritur toplistat me këngët e tij. Si artist brilliant e dallon veten nga artistët e tjerë të së njejtës moshë dhe kohës së sotme. Njihet si një nga artistët më të famshëm të New Yorkut që po merr dhe famë botërore.

Fansat e mi vijnë nga e gjithë bota, që nga Japonia, India, Anglia, Londra, Parisi, Austria, Gjermania dhe Austria. Por përkrahja më e fuqishme për muzikën time vjen nga fansat e mi besnik shqiptar. Ato kanë qenë me mua që në fillimet e karrierës time. Drenica njihet si vendi i hip hopit dhe jam krenar të vij nga Drenica dhe të arrij majat në Amerikë,” u shpreh G4shi.

Fëmijëria


Influenca e parë në muzikën e Gashi’t ka qenë legjenda Michael Jackson, kur Labinoti jetonte në Afrikë. “Artisti i parë që kam ndëgjuar në jetën time ka qenë Michael Jackson. Mbaj mend si fëmijë kam patur dëshirë të jem si ai dhe kërcej si ai,” tha Gashi. Pasi lëvizi në Amerikë, kur ishte në klasën e 3të të fillores, vëllai i tij Dre (Dre Gashi - Dj i talentuar në New York) e prezantoi me muzikën e hip hopit, me të cilën Gashi ra në dashuri. “Që kur kam dëgjuar hip hopin muzika u bë ëndërra e jetës time. Në shkollë të mesme kam kënduar majë tavolinave të mencës te shkolla dhe kur fillova universitetin vendosa ta marr muzikën seriozisht. Në këto vite muzika ishte pasioni im,” shtoi këngëtari.

Gashi ishte lojtar i shkëlqyer i futbollit amerikan në shkollë të mesme në Brooklyn dhe fitoi bursë të plotë për të luajtur futboll në universitet në shtetin e Massachusetts. Në vitin e dytë të shkollës të lartë, Gashi ndërpreu studimet dhe u mor vetëm me muzikë. Vitet që pasojnë hapin rrugën për Gashin si një histori suksesi dhe të një superstari ndërkombëtar.

Fillimet në Karrierën e Muzikës

Projekti i parë i Gashit u bë sukses i menjëhershëm. Në vitin 2010-11 G4shi u mor me inçizimin e mixtape-it të parë titulluar “Last of Rare Breed”, organizuar nga Don Cannon, famozi dhe nominuar nga American Grammy Award. CD-ja u prodhua në vitin 2011 dhe kishte bashkëpunime me repere të njohur si French Montana dhe Nipsey Hussle. Dy hite të kësaj cd-je janë: “Never Coming Back” dhe “Until the Day I Die”.

Gashi vendosi të largohet nga menaxhimi i tij dhe të vazhdojë një karrierë solo. Në 2012 G4shi themeloi grupin e tij me emër “Moxy”.

Moxy nënkupton konfidencë. Në këtë grup dua të përfshij talente të ndryshme të artit si videografë, shkrimtarë, artistë, reperë, stilistë mode, piktorë etj. Për mua Moxy nënkupton një grup njerëzish me ëndërra të mëdha që kanë ardhur nga zeroja dhe synojnë majat. Dua të siguroj një strehim për ta. Nëse unë arrij sukses dua që dhe ato persona rreth meje të jenë të suksesshëm dhe të lumtur,” tha themeluesi i Moxy’t, G4shi.

G4shi është fitues i disa konkurseve dhe fitues i vitit për çmimit “First Time Performances” i edicionit “First Look Sessions” në 2010 dhe 2011. Në vitin 2011 G4shi kreu turneun me artistin Joe Budden në Washington DC, Baltimore, Maryland dhe Virginia. Po në të njëjtin vit, hapi programin në koncertin për të famshin Wiz Kalifa në Connecticut.

"Fansat dhe shfaqet e mija janë gjithçka për mua. Pa fansat e mi nuk kam asgjë. Mbi të gjitha vlerësoj njerëzit. Vlerësoj ato persona që ia dinë vlerën muzikës së mirë dhe kuptojnë identitetin tim artistik. Ato që flasin për mua e shpërndajnë muzikën timë më shpejt se parja. Pas performancës fansat komentojnë që nuk kanë parë ndonjë shfaqe si ajo e imja në jetën e tyre. Për këtë unë jetoj dhe falenderoj fansat për përkrahjen e jashtëzakonshme,” tha artisti i suksesshëm, G4shi.

Viti i Suksesi dhe Famës

Në vitin 2012 G4shi u njoh si artisti me sukses dhe famë në Amerikë. Me lançimin e këngës dhe videoklipit “Rocket” G4shi u bë emër i njohur në skenën muzikore. (http://www.youtube.com/user/thekidgash)

Rocket është një vulë mode për stilin dhe muzikën time. Ne mund të veshim po të njëjtat rroba, por kur jam pranë teje unë bie në sy. Këtë e shfaq dhe në lirikën e këngës ‘I like it I cop it you can also cop it, but near yall I stand out like Yao when I rock it" që ka metaforën dhe kuptim e vet për lojtarin e Houston Rockets, Yao Mang,” tha superstari G4shi. 

Stili, flow, lirika dhe luku i tij e dallojnë G4shin nga artistët e gjeneratës dhe kohës së sotme. Muzika, individualiteti dhe stili personal janë tepër të veçanta:

Muzika është gjithçka për mua. Muzika është e vetmja gjë që më ka shoquar dhe qenë pranë meje kur të tjerët më lanë. Për mua muzika është ilaçi im – rrugdalja ime. Më pëlqen të përziej këndimin me repin. Preferoj beata të ndryshme dhe të krijoj melodi të bukura. E konsideroj veten të çuditshëm (weirdo). Më pëlqen çdo lloj muzike dhe ndëgjoj gjithçka përveç hip hopit. Edhe pse më pëlqen të bëj muzikë hip hop nuk e dëgjoj gjithmonë,” that këngëtari dhe shkrimtari i lirikave, G4shi.

Kanye West është një nga frymëzimet e muzikës time. Ai ka ndryshuar industrinë që nga veshja, moda dhe muzika. Ëndërra ime është që bëhem pjesë e firmës së tij “Good Music”. Kur kam qenë në shkollë të lartë kam pas dëshirë të hyja në vëllazërinë me emër

Kappa Alpha Psi. Tani që merrem me muzikë mendoj se Kanye West dhe kompania e tij janë Kappa Alpha Psi e industrisë të muzikës sot,” shtoi Gashi.

Karriera në Modë dhe sfilada në New York

G4shi po krijon trende me veshjet dhe stilin e tij të veçantë dhe ka tërhequr vëmendjen e bizneseve dhe firmave të modës. Në vitin 2012 u zgjodh si fytyra dhe përfaqësuesi i firmës së rrobave “Problem Child NYC”, për të cilën ai edhe modelon nëpër sfilada në New York.

Mendoj se stili dhe mënyra si prezanton veten janë kryesore. Kur më shikon mua dua të dish që jam rockstar. Më pëlqen të provoj rroba të ndryshme, më pëlqen xhinse të mira, një palë sneakers, bluze e gjatë, kapele e kuqe dhe dhëmë floriri. Të tjerët më konsiderojnë si krijues i trendeve të modës sepse nuk kam frikë ta çoj modën në një nivel tjetër. Nuk më shqetëson çfarë mendojnë të tjerët për mua. Jam konfident në zgjedhjet dhe stilin tim,” tha modeli dhe përfaqësuesi i firmës “Problem Child NYC”, Labinot Gashi.

Do jem provë që mund të arrish çfarë duash edhe kur nuk ke asgjë. Hip hop është një stil jete për mua, kur shikon hip hopin më shikon mua në të, që nga mënyra e veshjes, stili dhe muzika ime. Stili im nuk është nga kjo botë. Mendoj se jam i pari emcee i bardhë që ka patur sukses edhe në modë,” shtoi G4shi.

Projektet e Fundit dhe Muzika e Re

Në vitin 2012 Gshi lançoi dy videoklipe. “Beautiful World” u prodhua nga grupi i G4shit, Moxy dhe “Rocket” me regjizor Mike D’Angelo u prodhua po në të njëjtin vit. Vitin tjetër në 2013, kënga “Lana’s Song” u bë një superhit ndërkombëtar, xhiruar nga

86th and 1/4th në New York.

Disa nga këngët famoze të tij të fundit përfshijnë: “Lana’s Song” dhe “Take My Time” prodhuar nga Success Beats, “Rocket” nga Dj Chew, “Beautiful World” nga Myles William, "Right" dhe “Topback” nga Smokie Morrison.

Muzika ime ka ndryshuar me kohën. Kur fillova të merrem me muzikë fillimisht, kam qenë nën kontrollin e të tjerëve, që më thonin si t’ia arrija në kë fushë. Tani po merrem me atë që dua dhe bëj atë që dëshiroj. Muzika ime është nganjëherë miks me dub step, pak old school, dhe pak hip hop nga Houston Texas. Për mua Drenica është Teksasi i Kosovës, sepse është zemra e vendit. Për këtë arsye e ngadalësoj beatën në këngën time,” tregon i talentuari Gashi.

Momentalisht G4shi po merret me mixtapin e ri që quhet "I'll be right with you" që do lançohet në 2013, bashkë me albumin e tij të parë me titull “Didn’t Register”.

Albumi im i parë  ‘Didn’t register’ (nuk u regjistrova) do ketë muzikë të së ardhmes. Kur lashë shkollën e lartë prindërit më thanë të rikthehem dhe të regjistrohesha në klasa përndryshe nuk do ia dilja në jetë. Për mua plani parësor ka qenë gjithmonë muzika, e cila është pasioni im. Dua të jap mesazh dhe energji pozitive tek të rinjtë. Mesazhi im për gjeneratën e re është ky: Mos i ver kufi vetes. Në kohën e duhur, me njerëzit e duhur çdo gjë është e mundur. Nëse nuk po vjen shansi tani, mos u ndal, vazhdo pasionin tënd. Duaje  veten tënde. Përshëndes dhe falenderoj z. Gashin për mundësinë e kësaj interviste në restorantin e tij fantastik në New York, me ushqim, atmosferë dhe staf të mrekullueshëm. Falenderoj motrën time Leonora si një mentore në jetën time dhe vëllain tim Dre që më ka prezantuar me hip hopin. Falenderoj të gjithë shqiptarët kudo për përkrahjen tuaj ndaj meje. Influenca më e madhe për mua është Manhattan – New Yorku, ku unë gjej veten me muzikën, stilin dhe veçantinë time. Fansat mund ta ndjekin artistin ne twitter @G4SHI,” tha talenti G4shi.


 

 


Faqe 45 nga 98

Newsflash

QENDRA KULTURORE SHQIPTARE ”MIGJENI”- BORÅS SUEDI DHE

SHSHASH ”PAPA KLEMENTI I XI ALBANI” NË SUEDI

Ftojnë krijuesit, artadashësit dhe gjithë pasionantët e fjalës së shkruar artistike në

MANIFESTIMIN POETIK TRADICIONAL”SOFRA POETIKE BORÅS” NË BORÅS-SUEDI

Qendra kulturore shqiptare “Migjeni” në Borås, Suedi, në bashkëpunim me Shoqatën e Shrkimtarëve dhe Artistëve Shqiptar në Suedi ”Papa Klementi i XI Albani” për herë të dytë organizon manifestimin letrar me titull ”Sofra poetike”, një manifestim tradicional për klultivimin dhe ruajtjen e poezisë shqipe në mërgatë. Në këtë manifestim që do të mbahet në javën e fundit të muajit mars 2015, ftohen poetë shqiptarë nga Skandinavia dhe vende të tjera nga Evropa, nga Shqipëria, Kosova, Maqedonia, Mali i Zi anëtarë të Shoqatës së Shkrimtarëve, Artistëve Shqiptarë në Suedi, poetë suedezë, anëtarë të Lidhjes së Shkrimtarëve Suedez (Svenska Författare Förbundet), simpatizantë të fjalës së shkruar si dhe mysafirë nga vende tjera.

Lusim të gjithë poetët, krijues letrarë, të cilët kanë dëshirë të marrinë pjesë në ”Sofrën poetike Borås” në Borås që më së largut deri me 20 dhjtor 2014 të na dërgojnë nga tri poezi (punime origjinale të tyre) në adresën dituria@live.seKy email po mbrohet prej spambots-ave, të duhet JavaScript me e pa , në mënyrë që juria e formuar për këtë manifestim t`i shikojë punimet dhe t`i bëjë përgatitjet e duhura për manifestimin, ku me këtë rast do ndahen edhe shpërblime për poezinë më të mirë (tri shpërblime) tri nga ShShASh dhe tri nga QKSH Migjeni, për poetin më të suskesshëm, për poezinë më të mirë, për poezinë e mërgimit, librin më të mirë dhe prezentuesin më të mirë të punimit te tij si dhe shumë shpërbilme tjera.

Qëllimi i këtij manifestimi është që t`i afrojë njërin më tjetrin krjiuesit shiqptarë si dhe me krijuesit e vendit ku ne jetojmë dhe veprojmë, pra me poetë suedez dhe poetë kombesh e kombesish tjera që jetojnë dhe veprojnë këtu.

Mbesim me shpresë se ky manifestim do gjejë mbështjetjen tuaj për të filluar dhe të bëhet manifestim tradicional i poetëve tanë në mërgatë.

dituria@live.se Ky email po mbrohet prej spambots-ave, të duhet JavaScript me e pa

Mirë se vini me punimet e Juaja në këtë manifestim letrar të mërgatës sonë.

QKSH ”Migjeni” Borås, Suedi