Nga Petrit Malushi
„Një prill”
Le të jetë e hënë, e martë...
Çdo ditë jave le të jetë!
Le të shënojnë çdo datë
Kalendarët nëpër fletë!
Le të jesh pak i rënduar
Nga shëndeti, nga fuqia...
Le të jesh oreksmunguar,
Me lëkurë të vrarë nga lia...
Muajt le të venë e vinë
Nga janari në dhjetor!
Retë le ta zbrazin shinë,
Era le të sjellë dëborë…
Mund të jesh dhe i pamundur,
Me mjekime, regjim shtrati ...
Mund të ecësh duke u tundur,
Si të rënët nga takati...
Por, nuk ndalesh për premtime !
“Perpetum motor” mbi tokë
Me të folur, me shënime
Orator i rrallë ndër shokë.
Dhe ngarkohesh si deve
Lësho, zgjat litar dhe fill …
Për t´i mbajtur, nuk di pse
Ti, çdo datë kthen në...“Një prill” !